Die Sunn scheint aryetswo

Es macht nix aus, wie drieb ess iss,

Un dunkel bei uns do;

Der Himmel iss yuscht zugedeckt,

Die Sunn scheint aryetswo.

Deel Mensche so viel Druwwel hen,

Sie scheine nimme froh;

Doch kummt en bessri Zeit fer sie,

Die Sunn scheint aryetswo.

Die Mensche scheine kalt un hatt,

Behandle eem oft roh;

Doch grickt mer oftmols gude Wadd’,

Die Sunn scheint aryetswo.

Mer warre yung, mer waare alt,

Un lidderlich un gro;

Doch gude Zeide schpiert mer noch,

Die Sunn scheint aryetswo.

Sie scheint aa driwwe iwwerm Graab—

Die Biewel saagt uns so—

Ya, datt in alle Ewichkeit

Scheint sie noch aryetswo.

— Louise Adeline Weitzel